All posts by : healthylegs

डासांना पळवून लावण्यासाठी घरगुती उपाय  / home remedies to repel mosquitoes 🦟 : –

    घरामध्ये ,गार्डनमध्ये , आपल्या आजूबाजूच्या परिसरामध्ये बऱ्याचदा भरपूर डास येत असतात आणि डास चावल्यामुळे वेगवेगळ्या आजारांना आमंत्रण मिळत असते. जर पावसाळा असेल तर पाणी साचल्यामुळे तर डासांचे प्रमाण अधिकच वाढते. मार्केटमध्ये खूप साऱ्या अशा गोष्टी उपलब्ध आहेत ज्यामुळे डास दूर जाऊ शकतात परंतु त्या काही प्रमाणात जर विषारी असतील तर त्याचा आपल्या घरातील लहान मुलांना किंवा अगदी मोठ्यांना सुद्धा धोका होण्याची शक्यता नाकारता येणार नाही. म्हणूनच आज आपण असे काही घरगुती उपाय बघणार आहोत जे केल्याने डास तर दूर जातीलच परंतु आपल्या आरोग्याला इतर काही नुकसान देखील होणार नाही.

१ . पाच ते सहा लसणाच्या पाकळ्या घ्या. लसणाच्या पाकळ्या थोड्याशा ठेचून घ्या आणि त्यामध्ये पाच ते सहा कापराच्या वड्या क्रश करून टाका. नंतर यामध्येच एक चमचा गावरान तूप टाका आणि हे सर्व मिश्रण व्यवस्थित रित्या मिक्स करून घ्या. त्यानंतर तयार झालेले मिश्रण एका दिव्यामध्ये ओता आणि त्यावर एक कापूर ठेवून काडीपेटीच्या सहाय्याने पेटवून द्या. नंतर हळूहळू सर्व मिश्रण पेट घेईल आणि लसणाच्या आणि कापराच्या वासाने घरामधील डास पळून जातील. हा उपाय संध्याकाळच्या वेळी करायचा आहे ; कारण संध्याकाळी घरामध्ये जास्त प्रमाणामध्ये डास येतात.

२ . लसणाचा रस किंवा लसणाचे पाणी आपल्या शरीरास लावल्यामुळे देखील डास चावण्याची समस्या दूर होते.

३ . खोबरेल तेल आणि कडुनिंबाचे तेल समप्रमाणात घेऊन आपल्या शरीरावर लावल्यास डास आपल्याजवळ येत नाहीत आणि चावत देखील नाही.

४ . दारे आणि खिडक्या बंद करून घ्या आणि त्यानंतर कापराच्या सहा ते सात वड्या जाळा यामुळे देखील डास दूर पळून जातील.

५ . लव्हेंडर फुलाचा सुगंध डास पळवून लावण्यामध्ये मदत करतो म्हणूनच तुम्ही लव्हेंडर फ्लेवरचा रूम फ्रेशनर देखील वापरू शकता. त्याचबरोबर तुमच्या हाता पायांना लवेंडर तेल देखील लावू शकता यामुळे देखील तुम्हाला डास चावणार नाहीत. तसेच लव्हेंडर तेल ठिकठिकाणी फवारू शकता यामुळे देखील डास दूर निघून जाण्यामध्ये मदत होईल.

६ . डास पळवून लावण्यासाठी एक पारंपारिक आणि गावाकडील उपाय म्हणजे कडुनिंबाच्या पानांचा धूर करणे. या उपायामुळे देखील डास दूर पळून जातात.

७ . पुढील उपायासाठी पाच ते सहा लसणाच्या पाकळ्या बारीक करून घ्यायच्या आहे. थोडासा कापूस घेऊन तो पसरवून घ्यायचा आहे आणि त्यामध्ये लसूण , कापरापासून बनवलेली पावडर आणि कडुनिंबाची पावडर हे सर्व इन्ग्रेडियंट्स टाकायचे आहेत. नंतर हा पसरवलेला कापूस वात केल्यासारखा रोल करून घ्यायचा आहे. नंतर एका दिव्यामध्ये किंवा पणती मध्ये मोहरीचे तेल घेऊन त्यामध्ये ही तयार झालेली वात ठेवायची आहे आणि नंतर संध्याकाळच्या वेळी हा दिवा पेटवायचा आहे. संध्याकाळच्या वेळी का तर संध्याकाळी डास येण्याचे प्रमाण जास्त असते. हा उपाय केल्यामुळे डास पळून जातात.

८ . डासांसाठी लिंबूवर्गीय फळ आणि लवंग घातक असते. म्हणूनच पाण्यामध्ये लिंबाचा रस आणि लवंगाची पावडर टाकून हे पाणी ठिकठिकाणी फवारू शकता. यामुळे देखील डास दूर करण्यामध्ये मदत होईल.

९ . पुदिना देखील डासांसाठी घातक आहे म्हणूनच पुदिन्याचे तेल तुम्ही ठीक ठिकाणी फवारू शकता तसेच ताजी पुदिन्याची पाने देखील ठीक ठिकाणी ठेवू शकता. कुंडीमध्ये पुदिना देखील लावू शकता. या उपायामुळे देखील डास दूर होण्यास मदत होईल.

१० . चहाच्या झाडापासून बनवलेले तेल हे देखील डासांपासून सुटका होण्यासाठी खूपच उपयुक्त आहे. एका स्प्रे बॉटलमध्ये पाणी घेऊन त्यामध्ये थोडेसे टी ट्री ऑइल टाकायचे आहे आणि घरामध्ये ठीक ठिकाणी हे फवारायचे आहे .यामुळे घरामधील डासांची संख्या कमी होईल.

Author – Poonam Ghorpade Gore