Posts in category: Uncategorized

नाशिकमधील व्यक्तीचं अजय देवगणसाठी ” भीख माँगो आंंदोलन “…

       बरेचसे लोक हे बॉलीवूड मधील किंवा इतर सेलिब्रिटींचे फॅन्स असतात आणि काही फॅन तर इतके मोठे असतात की ते त्या सेलिब्रिटींच्या नावाचे किंवा चेहऱ्याचे टॅटू सुद्धा त्यांच्या शरीरावर बनवतात. परंतु नाशिक मधील एका व्यक्तीने प्रसिद्ध बॉलीवूड सेलिब्रिटी ज्यांनी विविध हिट चित्रपट दिले आहेत असे अजय देवगन यांच्यासाठी ” भीक मांगो आंदोलन ” सुरू केले आहे. एकीकडे अजय देवगन यांचे भरपूर सारे फॅन्स असतील परंतु अजय देवगन हे ते करत असलेल्या काही जाहिरातींमुळे ट्रोल होत असतात.

      अजय देवगन पान मसाल्याची जाहिरात आणि ऑनलाईन गेमिंगची जाहिरात या जाहिरातींमुळे नेहमीच ट्रोल होतात आणि आता तर नाशिक मधील एका व्यक्तीने अजय देवगनसाठी भीक मांगो आंदोलन सुरू केले आहे. नाशिक मधील हा व्यक्ती स्कुटी वरून फिरताना दिसत असून या व्यक्तीच्या स्कुटीला एक बॅनर लावलेला आहे आणि त्या बॅनर वर ” अजय देवगन के लिए भीक मांगो आंदोलन ” असे लिहिलेले असून त्याखाली प्रकाश कलोजे आणि मोबाईल नंबर लिहिलेला आहे. तसेच स्कुटीला स्पीकर आणि माइकची व्यवस्था सुद्धा केलेली असून या माईक मध्ये ही व्यक्ती पुढीलप्रमाणे बोलताना दिसत आहे. ही व्यक्ती म्हणते की ,” ऑनलाइन गेम च्या विरोधात आंदोलन करत आहे. ऑनलाइन गेम हे आपल्या पिढीला खराब करू राहिले. फिल्मस्टार तसेच क्रिकेटर अशा ऑनलाइन गेमची जाहिरात करत आहे ,देवाने त्यांना भरपूर दिलेले आहे तरीसुद्धा अशा प्रकारच्या ऍड करून आपल्या पिढीला खराब करत आहेत. आपण अजय देवगन 

ला हे भीक मांगो आंदोलन करून पैसे पाठवणार आहे आणि विनंती करणार आहे गांधीगिरी स्टाईलने, की कृपया करून अशा प्रकारची ऍड करू नये. जर तुम्हाला पैशाची आवश्यकता असेल तर मी परत भीक मागेल आणि परत तुम्हाला पैसे पाठवेल, परंतु अशी ऍड करू नये अशी विनंती करू गांधीगिरी स्टाईलने… यासाठी तुम्हा लोकांची साथ पाहिजे. ही साथ अशाप्रकारे पाहिजे की तुमच्याकडे असलेला मोबाईल वापरा… एक फोटो काढा, व्हिडिओ काढा .. सोशल मीडियावर पुढे पाठवा … आज जरी तुमच्या घरातलं ऑनलाइन गेमिंग मध्ये कोणी नसेल तरीसुद्धा भविष्यात 101% कोणीतरी असेल म्हणून हे थांबवलं पाहिजे … …. ” असं ती व्यक्ती स्कुटीवर माईकच्या सहाय्याने बोलत होती.

       या व्यक्तीचा हा व्हिडिओ सोशल मीडियावर व्हायरल होताना दिसत आहे आणि त्यावर विविध लोक कॉमेंट्स सुद्धा करत आहेत. काही कमेंट्स अशा सुद्धा येत आहेत की फक्त अजय देवगनच नाही तर इतर लोक सुद्धा अशा जाहिराती करत आहेत तर एका व्यक्तीने या व्यक्तीच्या व्हिडिओवर अशी सुद्धा कमेंट केली की तुम्ही समाजासाठी चांगले काम करत आहात.

टोमॅटोच्या किंमती गगनाला भिडल्या ,पुण्यामधील शेतकरी झाला करोडपती …

     सध्या सर्वच भाजीपाल्याच्या किंमती वाढताना दिसत आहेत त्यातल्या त्यात टोमॅटोच्या किंमती तर अगदी गगनाला भिडल्या आहेत.टोमॅटोच्या वाढत्या किंमती सर्व सामान्य लोकांना परवडण्यासारख्या नाहीत परंतु,काही शेतकऱ्यांचा टोमॅटोच्या वाढत्या किंमती मुळे फायदा होताना दिसत आहे.विविध आव्हांनावर मात करत महाराष्ट्रामधील पुण्यातील एका शेतकऱ्याने अवघ्या महिनाभरामध्ये ३ कोटींचे उत्पन्न मिळवून करोडपती झाले आहेत.या शेतकऱ्याचे नाव ईश्वर गायकर (वय ३६) , जुन्नर तालुक्‍यातील पाचघर गावातील आहे.यावर्षी मे महिन्यात कापणी केलेले टोमॅटो कमी किमतीमुळे टाकून देण्याचा कठीण निर्णय त्यांना घ्यावा लागला.

       परंतु तरी सुद्धा या धक्क्याने खचून न जाता त्यांनी अतूट मेहनत घेतली.ईश्वर गायकर यांनी त्यांच्या १२ एकर शेतात टोमॅटो लागवड केली आणि अथक परिश्रम घेतले.आता ईश्वर गायकर ह्यांच्या मेहनतीला चांगले फळ मिळाले आहे.त्यांनी ११ जून ते १८ जुलै दरम्यान त्यांच्या पीक उत्पादनाच्या विक्री मधून तीन कोटी कमावले असल्याचे सांगितले जात आहे.

     ईश्वर गायकर यांनी जुन्नर तालुक्यामधील नारायणगाव येथील कृषी उत्पन्न बाजार समिती येथे १८,००० क्रेट टोमॅटो ३ कोटींना विकले आणि त्यांचे पुढील उद्दिष्ट उरलेले टोमॅटोचे उत्पादन जे अंदाजे ४००० क्रेट आहे ते विकून अजून ५० लाख मिळवण्याचे आहे.

    वाहतुकीसह लागवडीचा एकूण खर्च ४० लाख रुपये होता, असे ते म्हणाले. “माझ्याकडे १८ एकर शेती आहे जिथे मी १२ एकरामध्ये टोमॅटोची लागवड करतो. मी ११ जूनपासून १८,००० क्रेट टोमॅटो विकले आहेत आणि आतापर्यंत ३ कोटी रुपये कमावले आहेत,” गायकर म्हणाले. ११ जून रोजी, त्याच्या उत्पादनाला ७७० रुपये प्रति क्रेट (३७ ते ३८ रुपये प्रति किलो) भाव मिळाला आणि १८ जुलै रोजी, त्यांनी  २२०० रुपये प्रति क्रेट (११० रुपये प्रति किलो) टोमॅटो विकले.

     सध्या टोमॅटोला चांगला भाव मिळत असल्याने टोमॅटो उत्पादक शेतकरी आनंदी आहेत, परंतु दोन महिन्यापूर्वी टोमॅटोला अत्यंत कमी भाव असल्याकारणाने बऱ्याचशा शेतकऱ्यांना त्यांनी उत्पादन घेतलेले टोमॅटो फेकून द्यावे लागले होते आणि अशा वाईट परिस्थितीचा सामना त्यांना आणि त्यांच्या कुटुंबीयांना करावा लागला होता. त्यावेळी त्या शेतकऱ्यांनी आणि त्यांच्या कुटुंबीयांनी वाईट काळ सुद्धा पाहिला. ईश्वर गायकर यांनी सुद्धा मे महिन्यामध्ये एक एकर टोमॅटो पिकवला होता परंतु त्यावेळी भाव खूपच कमी असल्यामुळे मोठ्या प्रमाणावर टोमॅटो त्यांना फेकून द्यावे लागले त्यावेळी भाव असा होता की प्रतिक्रेट पन्नास रुपये म्हणजेच प्रति किलोग्रॅम अडीच रुपये …

     ईश्वर गायकर यांना २०२१ मध्ये सुद्धा पंधरा ते सोळा लाखांचे नुकसान झाले होते आणि नफा सुद्धा कमी निघाला होता. परंतु ईश्वर गायकर यांनी खचून न जाता यावर्षी पुन्हा एकदा टोमॅटोचे उत्पादन घेण्याचे ठरवले आणि टोमॅटोच्या लागवडीवर खर्च करणे सुद्धा सुरूच ठेवले आणि त्यांच्या मेहनतीला यश आले.

      मे महिन्यामध्ये एवढे कडक ऊन असून सुद्धा ईश्वरजी गायकर यांनी टोमॅटो उत्पादनाची व्यवस्थितरित्या काळजी घेतली. इतर भागांमध्ये उच्च तापमान असल्यामुळे टोमॅटोच्या उत्पादनाला मोठ्या प्रमाणामध्ये फटका बसला परंतु ज्या शेतकऱ्यांनी कठोर मेहनत घेतली अशा शेतकऱ्यांना टोमॅटो उत्पादनामध्ये चांगला नफा मिळाला.

सर्वसामान्य जनतेला टोमॅटो विकत घेणे जरी परवडत नसले तरी सुद्धा सर्वसामान्य जनतेने सुद्धा शेतकऱ्यांचा विचार केला पाहिजे की ,कधीतरी शेतकऱ्यांच्या उत्पादनाला चांगला भाव मिळतो आणि इतर वेळी अत्यंत कमी भाव मिळतो ,ज्यावेळी शेतकऱ्यांच्या उत्पादनाला कमी भाव मिळतो त्यावेळी कुणी काहीही बोलत नाही; परंतु शेतकऱ्यांच्या उत्पादनाने चांगला भाव मिळवल्यानंतर त्यावर बरेचसे लोक बोलू लागतात.

नवीन ऍपल एक्सक्लुझिव्ह आयफोन 15 ची आश्चर्यचकित करणारी डिझाइन …

Apple iphone 15 pro max

How much will iPhone 15 Pro Max cost?

Is iPhone 15 Pro Max out yet?

Is Apple launching iPhone 15?

        आजकाल मार्केटमध्ये विविध प्रकारचे मोबाईल फोन्स उपलब्ध आहेत ,परंतु त्यातल्या त्यात लोकांमध्ये जास्त क्रेझ असलेला आणि सर्वात महागडा असा मोबाईल हा ॲपल कंपनीचा येतो. ॲपल नेहमीच आयफोनचे वेगवेगळे व्हर्जन किंवा डिझाईन्स मध्ये बदल करत असते. सध्या ॲपलचे आयफोन 15 मध्ये जे बदल झाले ती डिझाईन लीक झाली आहे, परंतु तरीसुद्धा कंपनीकडे काहीतरी सरप्राईज अजून बाकी आहे.

        विश्वासार्ह असा ऍपल इनसाइडर ShrimpApplePro ने चीनी सोशल मीडिया साइट Weibo (Apple बद्दल वारंवार माहिती देणारा स्त्रोत) वरून उघड केले आहे की iPhone 15 तीन नवीन रंगांमध्ये येईल: हिरवा, हलका पिवळा आणि गुलाबी. 

तसेच ॲपल आयफोन 15 पुढील रंगात येणार असल्याची माहिती मिळत आहे :

– हलका पिवळा  Light Yellow

– गुलाबी Pink

– प्रॉडक्ट रेड Product (RED)

– मिड नाईट Midnight 

– स्टार लाईट Starlight

– हिरवा Green

      नवीन रंग हा आयफोन 14 च्या स्ट्राँग येलो रंगापेक्षा वेगळा आहे.तर लीक झालेली माहिती जर खरी असेल तर ॲपल निळा, जांभळा आणि डीप येलो कलर वगळत आहेत.मार्च मधील एका मार्केट रिपोर्ट नुसार iPhone 14 आणि iPhone 14 Plus खरेदी करणाऱ्या ग्राहकांसाठी जांभळा आणि निळा हे आवडते पर्याय आहेत. ॲपल दर वर्षी रंगांमध्ये थोड्या फार प्रमाणात बदल करीत असतो.

     गुलाबी रंग सुद्धा बऱ्याचश्या ग्राहकांचा आयफोन साठी आवडीचा रंग आहे. ॲपलने १५ इंची मॅकबुक जारी करून या वर्षी ग्राहकांची मागणी मंजूर होऊ शकते असे दर्शवले आहे.

     लीक झालेल्या माहिती नुसार ,आयफोन 15 श्रेणीच्या किंमती $200 पर्यंत वाढू शकतात ,परंतु नेमकी किंमत काय असू शकते हे अद्याप समजले नाही.ह्या मध्ये टायटॅनियम चेसिस हा सुद्धा महत्वाचा घटक आहे.

        आयफोन 15 प्रो आणि प्रो मॅक्स मॉडेल्सना नेक्स्ट-gen 3nm A17 चिपसेट, सुपर थिन बेझल्स, अपग्रेड केलेले UWB आणि सॉलिड-स्टेट अँक्शन बटण जे म्यूट स्विचची जागा घेते, दोन्ही मॉडेल्ससाठी हे कोर अपग्रेड अधिक निश्चित आहेत. 

       तसेच असे सुद्धा होऊ शकते की आयफोन 15 आणि आयफोन 15 प्लस मॉडेलची डिझाईन आयफोन 14 प्रो च्या डिझाइनसारखी असू शकते आणि A16 चिप वापरणे सुद्धा अपेक्षित आहे. 

     ॲपल आयफोन 15 आणि आयफोन 15 प्रो / मॅक्स कदाचित सप्टेंबर २०२३ मध्ये लॉन्च होण्याची शक्यता वर्तवली जात आहे.ॲपल आयफोन 15 प्रो मॅक्सची प्री ऑर्डर बुकिंग १ सप्टेंबर २०२३ पासून सुरू होण्याची दाट शक्यता आहे.म्हणजेच आयफोनची ॲक्चुअल विक्री सुरू होण्यापूर्वीच प्री ऑर्डर बुकिंग करता येणार आहे.

      जगभरामधील बहुतांश मुख्य बाजारपेठांमध्ये ॲपल आयफोन 15 प्रो मॅक्स उपलब्ध होऊ शकतो,अशी अपेक्षा आहे.तसेच ॲपल आयफोन 15 प्रो मॅक्सची सुरुवातीला जास्त मागणीमुळे उपलब्धता कमी असू शकते.ॲपल आयफोन 15 प्रो मॅक्सची किंमत $1,199 ते $1799 च्या दरम्यान असू शकते अशी सुद्धा अफवा आहे.

इर्शाळवाडीवर दरड कोसळली, सोन्यासारखं गाव ढिगाऱ्याखाली …

Irshalwadi Landslide –

      राज्यामध्ये काही ठिकाणी पाऊस धो – धो बरसत आहे तर काही ठिकाणी अगदी कमी किंवा काहीच नाही. ज्या ठिकाणी शेती आहे अशा ठिकाणी पावसाची आवश्यकता आहे, परंतु त्या ठिकाणी पावसाच्या अभावामुळे पेरणी केलेली पिकं अजून उतरली नाहीत, तर काही ठिकाणी जास्तीचा पाऊस पडल्याने नुकसान सुद्धा होत आहे.

        बुधवारी ,१९ जुलै रोजी रात्री रायगड जिल्ह्यातील खालापूर येथील ईर्शाळगडावरच्या ठाकूरवाडीवर दरड कोसळली आणि त्या घटनेमध्ये जवळपास ४० ते ५० घरे मलब्याखाली गाडली गेली असल्याची दाट शक्यता वर्तवली जात आहे. ही वाईट घटना रात्री येथील लोक झोपेत असतानाच घडली आणि येथील आदिवासी पाडा उध्वस्त झाला. या घटनेमध्ये काही जणांचा मृत्यू सुद्धा झाला तर बऱ्याचशा लोकांना वाचवण्याचे कार्य अजून सुद्धा सुरू आहे. येथील लोकांना वाचवण्यासाठी विविध रेस्क्यू टीम या ठिकाणी कार्यरत आहेत. रेस्क्यू ऑपरेशन व्यवस्थित रित्या सुरू असून अडकलेल्या बऱ्याचशा लोकांना बाहेर काढण्यामध्ये सुद्धा यश आले आहे.

       घटना घडलेल्या ठिकाणी पाऊस सुरू असल्यामुळे एन डी आर एफ च्या बचाव पथकांना मदत कार्य करत असताना काही अडचणींचा सामना सुद्धा करावा लागत आहे. विविध नेते मंडळीं सुद्धा घटनास्थळी दाखल झाले त्यामध्ये मुख्यमंत्री एकनाथ शिंदे, गिरीश महाजन, उदय सामंत, दादा भुसे, विधान परिषद विरोधी पक्ष नेते अंबादास दानवे तसेच आदिती तटकरे यांचा समावेश आहे.

        ईर्शाळगडाच्या पायथ्याशी जे चौक नावाचे गाव आहे त्या गावापासून सहा किलोमीटर डोंगर भागामध्ये मोरबे धरणाच्या वरच्या भागात आदिवासी वाडी आहे. या ठिकाणी आदिवासी ठाकूर समाजाची घरे आहेत आणि या घरांवरच दरड कोसळल्याची ही वाईट घटना घडली आहे. जवळपास ९० ते १०० टक्के घरे या ढिगार्‍याखाली गेली असल्याची माहिती मिळत असून जीवित हानी सुद्धा झाली आहे.

      येथील लोकांची मदत करण्यासाठी एन डी आर एफ,एस डी आर एफ,टी डी आर एफ या पथकांच्या माध्यमातून येथे मदत कार्य सुरू असून विविध सामाजिक संस्थांनी तसेच स्थानिक नागरिकांनी सुद्धा मदतीचा हात पुढे केला आहे.

    सतत पाऊस सुरू असूनही आणि प्रतिकूल भौगोलिक परिस्थिती असताना सुद्धा शक्य ते सर्व प्रयत्न सुरू असून लवकरात लवकर मदतकार्य पूर्ण करण्यात येईल असे मुख्यमंत्री एकनाथ शिंदे यांनी सांगितले. त्याचबरोबर मुख्यमंत्र्यांनी मदत कार्य करण्यासाठी मदतीचा हात पुढे करणाऱ्या संस्था आणि स्वयंसेवकांचे सुद्धा आभार मानले.

     या दुर्घटनेमध्ये १२ जणांचा मृत्यू झाला असल्याची माहिती मिळत आहे. येथील काही ग्रामस्थ भातशेतीच्या कामासाठी इतर ठिकाणी गेले असून काही विद्यार्थी आश्रम शाळेमध्ये शिक्षण घेत आहे, त्यांचा सुद्धा शोध घेतला जात आहे. येथील ग्रामस्थांचे तात्पुरत्या स्वरूपामध्ये पुनर्वसन करण्यासाठी पायथ्याशीच ५० कंटेनरची व्यवस्था करण्यात येत असून या ग्रामस्थांचे कायमस्वरूपी सुद्धा पुनर्वसन करण्यात येईल असे देखील मुख्यमंत्री एकनाथ शिंदे यांनी स्पष्ट केले.

       या दुर्घटनेमध्ये ९३ जणांना वाचवण्यामध्ये यश आले आहे तर १२ जणांचा मृत्यू झाला आहे. सर्वजण सुखरूप या घटने मधून बाहेर पडावेत हीच देवाच्या चरणी प्रार्थना …

अतिशय खडतर परिस्थितीमधून सुद्धा कविता राठोडने MPSC मध्ये मिळवले २ पदे…. त्यांच्या घरापर्यंत वीज आणि पाणी पुरवठा अद्याप नाही ….

      जत तालुक्यामधील आसंगी तुर्क हे कविता राठोडचे गावं.बंजारा समाजामधील कविता राठोड यांनी लोकसेवा आयोगाच्या परीक्षेमध्ये एकाच वेळी दोन पदे मिळवली असून त्या राज्यात भटक्या विमुक्त जाती अ प्रवर्गात राज्यात “कर सहायक” म्हणून पहिल्या आल्या तर “मंत्रालय लिपिक” म्हणूनही राज्यात चौथा क्रमांक पटकावला आहे.

     कविता राठोड ह्यांच्या आई (वय ५५ वर्ष) आणि वडील (५८ वर्ष वय) दोघेही विहीर खोदण्याचे काम करतात.कविता राठोडचा भाऊ सुद्धा कामावर जातो. कविताच्या आई वडिलांनी खूप कष्टाने कविताला शिकवले.कविताने सुद्धा आई वडिलांच्या मेहेनतीला स्वतः सुद्धा मेहनत घेवून फळ मिळवून दिले.कविता राठोड ह्यांचे प्राथमिक आणि माध्यमिक शिक्षण गावामधीलच जिल्हा परिषद शाळेमधून झाले. आठवी ते दहावीची शाळा कधी पडक्या घरात भरत तर कधी बौद्ध विहाराच्या कोपऱ्यात भरत.आठवड्यामधून एकदा शाळेतील विद्यार्थीच तेथील जमीन शेणाने सारवत.

     आसंगी तुर्क हे गाव महाराष्ट्र-कर्नाटक राज्यांच्या सीमेवर असून ह्या गावापर्यंत अजून सुद्धा वीज आणि पाणी पुरवठा पोहचलेले नाही.कविता राठोड ह्यांनी अतिशय मेहनत करून हे यश मिळवलेले आहे.कविता राठोड ह्यांच्या यशामध्ये त्यांच्या कुटुंबीयांचा सुद्धा मोलाचा सहभाग आहे.

    कविता राठोड ह्यांचे शिक्षण संत सद्गुरू भीमदास महाराज करांडे विद्यामंदिर या शाळेमध्ये झाले तर त्यांचे अकरावी आणि बारावी हे शिक्षण राजारामबापू पाटील शाळेत झाले.ही शाळा १३ किलोमीटर दूर होती, त्या हे अंतर सायकलने पार करत असत.विज्ञान विषय असणारी ती एकमेव मुलगी होती.बारावीला प्रवेश घेतल्यानंतर त्यांना सकाळी क्लासेस असायचे त्यामुळे त्या पहाटे ४ लाच उठून सायकलवरून १३ किलोमीटर प्रवास करायच्या…

       बारावी मध्ये ७० टक्के इतके मार्क्स मिळवले.पुढील शिक्षण सुद्धा विज्ञान शाखेमध्ये घेण्याची इच्छा …परंतु त्यांना वेळेमध्ये पुढील प्रक्रिया समजली नाही आणि त्यामुळे त्यांना विज्ञान शाखेमध्ये प्रवेश घेता आला नाही.नंतर घरी थांबल्या असत्या तर वर्ष वाया गेले असते ह्या मुळे त्यांनी नाईलाजास्तव बॅचलर ऑफ आर्ट्सला प्रवेश घेतला.बाबासाहेब आंबेडकर वसतिगृह, विटा येथे प्रवेश मिळाला परंतु कॉलेजसाठी पलूसला आर्टस् कॉमर्स कॉलेज येथे जावे लागले.

       तिथे शिकत असतानाच इस्लामपूर येथील अस्लम शिकलगार यांच्या महाराष्ट्र अकॅडेमीची माहिती मिळाली. दरम्यान कविता राठोड ह्यांचे वडील आणि भाऊ ह्यांनी पैसे जमा केले ,कर्ज काढले असे करून कविता ह्यांच्या शिक्षणाचा खर्च भागवला. कविताचा भाऊ बंडू ह्यांना सुद्धा एसटी मध्ये वाहक म्हणून नोकरी मिळाली परंतु त्या ठिकाणी सुद्धा त्यांनी कर्ज काढले असल्याने हातात अगदी कमी पगार मिळत असे.कविता मिळून पाच भावंडे ….दोघी बहिणी आणि तीन भाऊ…कविता राठोड ह्यांनी महाराष्ट्र अकॅडेमीमध्ये जवळपास बारा ते चौदा तास अभ्यास केला. कोरोणा काळामध्ये तर त्यांची खरी परिक्षा होती.सगळे विद्यार्थी गावाला गेलेले होते परंतु कविता ह्यांना त्यांच्या गावी जाता आले नाही.कविता ह्यांचे आई वडील कोकणामध्ये विहीर खोदण्याच्या कामासाठी गेलेले होते. कोरोना काळामध्ये जिल्हा बंदी असल्या मुळे त्यांना आई वडिलांकडे जाता आले नाही.

              अतिशय खडतर काळ होता परंतु कविता ह्यांनी हार मानली नाही.त्यांनी जास्तीत जास्त वेळ अभ्यास केला आणि एकाच वेळी दोन पदे मिळवण्यामध्ये त्या यशस्वी झाल्या. कविता राठोड यांच्या यशानंतर बंजारा समाजामधील लोकांनी तसेच ग्रामस्थांनी त्यांचे कौतुक केले आणि त्यांच्या आनंदामध्ये सहभागी झाले.

केदारनाथ मंदिरातील फोटोग्राफी बंद … व्हिडिओ काढण्याला सुद्धा बंदी तसेच मोबाईल बंदी …

     आयुष्यामध्ये एकदा तरी या ठिकाणी जावे असे अतिशय पवित्र असे धार्मिक स्थळ केदारनाथ या ठिकाणी दरवर्षी लाखो करोडो भाविक दर्शनासाठी जात असतात.  हल्ली मोबाईलचा उपयोग लोकांकडून जास्त होताना दिसत आहे आणि बरेचसे लोक धार्मिक ठिकाणी फोटोज किंवा व्हिडिओज काढतात परंतु बऱ्याच ठिकाणी यावर बंदी घातलेली असते. केदारनाथ या ठिकाणी सुद्धा व्हिडिओ काढण्याला तसेच फोटोज काढण्याला बंदी घातलेली आहे.

     केदारनाथ हे पवित्र ठिकाणांमधील लोकप्रिय असे ठिकाण असून या ठिकाणी थोड्या दिवसांपूर्वीच मंदिर प्रशासनाने मंदिर परिसरामध्ये व्हिडिओ तसेच रिल्स बनवण्यासाठी बंदी घातली होती तर आता मोबाईल फोन संदर्भात सुद्धा मोठा निर्णय मंदीर प्रशासनाने घेतला असून केदारनाथ मंदिरामध्ये आता भाविकांना मोबाईल फोन घेऊन जाण्यास मनाई आहे.

    केदारनाथ येथील मंदिर समितीने मोबाईल फोनवर बंदी घातली आहे आणि त्यासोबतच मंदिर समितीने या ठिकाणी कपडे घालण्याबाबत सुद्धा काही नवीन नियम लागू केले आहेत. केदारनाथ मंदिरामध्ये फोटो, व्हिडिओ किंवा रिल्स काढण्यासाठी बंदी आहे. केदारनाथ मंदिर परिसरामधील काही व्हिडिओ काही दिवसांपूर्वी वायरल झाले होते आणि या व्हिडिओमुळे काहींच्या भावना दुखावल्या गेल्या असल्याचा आरोप सुद्धा करण्यात आला होता या पार्श्वभूमीवर येथील मंदिर प्रशासनाने मोबाईल फोनला बंदी घातली आहे.

नेमका कोणता व्हिडिओ व्हायरल झाला होता …. ?

    काही दिवसांपूर्वीच केदारनाथ येथील व्हिडिओ व्हायरल झाला होता. त्या व्हिडिओमध्ये विशाखा नावाची मुलगी जी युट्युबर आहे ती तिच्या प्रियकरासोबत केदारनाथ या ठिकाणी दर्शनासाठी आली होती. अचानक विशाखा हीने तिच्या प्रियकराला प्रपोज केले आणि तो लग्नासाठी हो म्हणाला ,अशी संपूर्ण घटना असलेला व्हिडिओ विशाखाने सोशल मीडियावर अपलोड केला आणि तो व्हायरल झाला. हा व्हिडिओ बघणाऱ्या बऱ्याच लोकांनी केदारनाथ हे ठिकाण सामान्य पर्यटन स्थळासारखे वागवले जात असल्याचे सांगितले आणि त्यामुळेच असे व्हिडिओ किंवा रील्स काढण्याला तसेच यूट्यूब साठी सुद्धा व्हिडिओ बनवण्यासाठी बंदी घालण्यात आलेली आहे.

     श्री बद्रीनाथ केदारनाथ मंदिर समितीचे अध्यक्ष अजय अजेंद्र यांनी असे स्पष्ट केले आहे की, केदारनाथ धामला जाणाऱ्या यात्रेकरूंनाही विनम्र कपडे घालण्याचे आवाहन करण्यात आले आहे. मागील काही अनुचित वर्तनाच्या घटनांना प्रतिसाद म्हणून ही मार्गदर्शक तत्त्वे जारी करण्यात आली आहेत. अजय अजेंद्र यांनी मंदिराचे पावित्र्य राखण्यासाठी आणि काही यात्रेकरूंच्या कथित असभ्य वर्तनामुळे निर्माण होणारे गैरसमज टाळण्यासाठी योग्य त्या आवश्यकतेवर भर दिला आला आहे.

सीमा हैदर : नेमकी प्रेमिका की जासुस…..?

     सध्या भारत आणि पाकिस्तान मधील सर्व मीडिया चॅनलवर चर्चेत असलेला विषय म्हणजे सीमा हैदर ….

भारतातील लोकांच्या मते सीमा हैदर ही पाकिस्तानामधील एजंट असावी आणि कदाचित ती इतर काही कहाण्या सांगून भारतामध्ये जासूसी करण्यासाठी आली असावी. तर पाकिस्तानियांच्यामते सीमा हैदर ही अविश्वासू असून ती भारतामधील असावी.

        सीमा हैदर ही पाकिस्तान मधील कराची या ठिकाणची असून तिचं लग्न गुलाम हैदर नावाच्या व्यक्तीशी २०१४ मध्ये झालं आणि तिला चार मुले देखील आहेत.२०१९ मध्ये,सीमा हैदर हिच्या म्हणण्यानुसार पब्जी खेळत असताना सीमा हैदर हीची ओळख भारतामधील सचिन मीनाशी झाली. सीमा ही २७ वर्षाची आहे तर सचिन मीना हा २५ वर्षांचा आहे. सीमा हैदर ही सचिन मीनाच्या प्रेमात पडली आणि त्यानंतर या प्रेमापोटीच अवैध पद्धतीने सीमा हैदर हिने भारतामध्ये प्रवेश केला. सीमा हैदरही पाचवी शिकलेली आहे असं म्हणत आहे परंतु ती बोलताना बरेचसे शब्द इंग्रजी भाषेतील वापरत असल्याने तिच्यावर संशय येत आहे, की कदाचित ती खोटे बोलत असावी.

    सीमा हैदर ही कदाचित पाकिस्तानची गुप्तहेर असावी अशी शंका येत असल्यामुळे उत्तर प्रदेश मधील अँटी टेरिझम  स्कॉडने ( ATS -Anti-Terrorism Squad ) सीमा हैदर हिची चौकशी सुरू केली आहे. एटीएस हे सचिन मीना, सीमा हैदर आणि सचिन मीनाचे वडील नेत्रपाल मीना या सर्वांची चौकशी करत आहे. ही चौकशी करण्याचा उद्देश म्हणजे सीमा हैदर हिने विविध ठिकाणी सांगितलेली कहानी खरी आहे की खोटी ….. ?

     सीमा हैदर ही नेपाळ मार्गे चार छोट्या मुलांसोबत एवढ्या सहजासहजी भारतात कशी येऊ शकते हा देखील प्रश्न समोर येत आहे. सीमा हैदर हीने तिचं पाकिस्तानमधील घर बारा लाख रुपयांना विकून ती प्रथम दुबई या ठिकाणी गेली. दुबई मधून नेपाळ आणि नेपाळमधून थेट भारतामध्ये प्रवेश केला. नेपाळ ते भारतापर्यंतचा प्रवास बस द्वारे केला असल्याचं सीमा हैदर हिचे मत आहे आणि तिच्याकडे नेपाळपासून नवी दिल्ली पर्यंतचे बस तिकीट सुद्धा आहे परंतु ते बस तिकीट तिचे नसल्याची सुद्धा शंका येत आहे. सीमा हैदर हीच्याकडे एक पेक्षा अधिक पासपोर्ट तसेच इतर काही कागदपत्रे आहेत ते पुढील प्रमाणे :

– स्वतःचे दोन पासपोर्टस्

– चार मुलांचे पासपोर्ट

– चार जन्म प्रमाणपत्र

– चार मोबाईल्स

– तीन खोटे ओळखपत्र

– पाच वॅक्सिनेशन सर्टिफिकेट्स

– पाकिस्तानच्या गृहमंत्रालयाची नागरिक रजिस्ट्रेशनशी संबंधित सूची

– नेपाळपासून ते नवी दिल्ली पर्यंतचा प्रवास बसने केला असल्याचा दावा सीमा हैदर हीने केल्यामुळे तिच्याकडे तसे बस तिकीट सुद्धा आहे, परंतु ते बस तिकीट तिचे नाही असा संशय आहे. सीमा हैदर हीच्याकडे नकली ओळखपत्र तसेच इतर काही कागदपत्रे आले कुठून हा देखील प्रश्न समोर येत आहे.

    तसेच सीमा हैदर हिने पाकिस्तान मधील कराची या ठिकाणी बारा लाखांमध्ये घर विकले आणि नंतर ती भारतामध्ये आली असा दावा तिने केला आहे परंतु त्याबद्दल सुद्धा चौकशी होत आहे.

    सीमा हैदर हीने भारतातील हिंदू मुलाशी लग्न केलं आणि ती पाकिस्तान मधून भारतामध्ये पळून आली त्यामुळे पाकिस्तान मधील काही लोक याचा बदला हिंदू महिलांकडून घेऊ असे म्हटले . ह्यूमन राइट्स कमिशन ऑफ पाकिस्तानने सुद्धा या रिपोर्टवर चिंता व्यक्त केली आहे. पाकिस्तान मधील सिंध प्रांत मधील काही हिंदू मुली व महिला बेपत्ता आहेत.

     सीमा हैदर हीने ज्यावेळी भारतामध्ये प्रवेश केला त्यापूर्वी तिच्याकडे पाकिस्तानी सिम कार्ड होते परंतु तिने भारतात प्रवेश करण्यापूर्वीच ते सिम कार्ड फेकून दिल्याचा सुद्धा आरोप होत आहे. सीमा हैदर हिने भारतामध्ये आल्यानंतर सचिनला वायफायद्वारे कॉल केला.

      सीमा हैदर हीचा पती गुलाम हैदर हा सौदी अरेबिया मध्ये नोकरी करतो आणि त्याच्याकडून मारहाण होत असल्याचे आरोप सीमा हिने केले आहे. तसेच सीमा हैदर असाही दावा करत आहे की ती कधीही पाकिस्तानामध्ये परत जाणार नाही. परंतु सीमा हैदर हिच्यावर बरेचसे संशय असल्याकारणाने आणि तिने अवैध पद्धतीने भारतामध्ये प्रवेश केल्यामुळे तिच्यावर गुन्हा दाखल झाला आहे. तिला जामीन मिळाली आहे परंतु तपास यंत्रणा सत्याचा शोध घेत आहेत. 

    सीमा हैदर हिला जामीन मिळालेली असली तरी सुद्धा घर सोडून कुठेही जाण्याची तिला परवानगी नाही. सीमा हैदर हिचा तपास झाल्यानंतर त्या संदर्भातील अहवाल लखनऊ पोलीस मुख्यालयामध्ये सादर केला जाणार आहे आणि त्यानंतर हा अहवाल दिल्ली गृहमंत्रालयात पाठवला जाईल,असे यूपी एटीएस यांनी सांगितले.

” बाईपण भारी देवा ” या चित्रपटाने ओलांडला ५० कोटींचा टप्पा ….

       ३० जून रोजी ” बाईपण भारी देवा ” हा चित्रपट प्रदर्शित झाला असून प्रेक्षकांकडून या चित्रपटाला भरभरून असा प्रतिसाद मिळत आहे. हा चित्रपट प्रदर्शित झाल्यापासून थिएटर्समध्ये तुफान चालत आहे. बाईपण भारी देवा या चित्रपटाने ५० कोटींचा टप्पा पार केला आहे. रविवार, दिनांक १६ जुलै रोजी या चित्रपटाने पाच कोटींची कमाई केले असल्याचे म्हटले जात आहे आणि आता तर जवळपास या चित्रपटाची कमाई ५५ कोटी रुपयांच्या आसपास झालेली आहे.

     ” बाईपण भारी देवा” या चित्रपटात रोहिणी हट्टंगडी, वंदना गुप्ते, सुकन्या कुलकर्णी, शिल्पा नवलकर, सुचित्रा बांदेकर आणि दीपा परब या मुख्य भूमिकेत असून या सहा जणी बहिणी दाखवलेल्या असून अतिशय उत्कृष्ट काम सर्वांनीच केलेले आहे. या सहाही बहिणी काही कारणांमुळे एकमेकींपासून दुरावल्या होत्या आणि त्यांच्या वैयक्तिक आयुष्यामध्ये विविध अडचणींचा सामोरा त्या करताना दिसत आहे ,मात्र शेवटी सहाही बहिणी पुन्हा एकदा एकत्र येतात.” बाईपण भारी देवा ” हा उत्कृष्ट चित्रपट केदार शिंदे यांनी दिग्दर्शित दिग्दर्शित केलेला आहे.

         ” बाईपण भारी देवा ” या चित्रपटाला बघण्यासाठी अगदी पहिल्या दिवसापासून प्रेक्षक भरभरून प्रतिसाद देत आहेत.अगदी आपल्या मोबाईल मध्ये सुद्धा अगदी रोज  विविध बायकांचे चित्रपट बघायला गेल्या असल्याचे स्टेटस आपल्याला दिसतात.अनेक बायका ग्रूपने ” बाईपण भारी देवा ” हा चित्रपट बघत आहेत.हा चित्रपट अगदी लहानग्यांपासून ते मोठ्यांपर्यंत सर्वच वयोगटातील प्रेक्षक बघत आहेत. काही किस्से असे सुद्धा ऐकायला आले की, अगदी ज्येष्ठ वयोगटातील आजी ज्या बऱ्याच वर्षापासून चित्रपट बघायला थेटर मध्ये गेल्या नाही अशा सुद्धा आजी हा चित्रपट आवर्जून बघत आहे.

        ” बाईपण भारी देवा ” हा चित्रपट कधी कधी हसवतो तर कधी कधी भावनिक सुद्धा आहे. ” बाईपण भारी देवा ” हा चित्रपट महिलांनी नेहमीच फक्त इतरांचाच सारखा सारखा विचार न करता स्वतःसाठी सुद्धा जगले पाहिजे  हे शिकवतो.

      ” बाईपण भारी देवा ” या चित्रपटाने पहिल्या आठवड्याच्या अखेरीस १२.५० कोटी रुपयांची कमाई केली होती तर दुसऱ्या आठवड्यामध्ये २४.८५ कोटींची कमाई केली होती. मराठी चित्रपट सृष्टी मधील एका दिवसात सर्वाधिक कमाई करणारा “बाईपण भारी देवा” हा चित्रपट ठरला आहे.

सुप्रसिद्ध अभिनेते रवींद्र महाजनी काळाच्या पडद्याआड…

         रवींद्र महाजनी हे गेल्या काही दिवसांपासून तळेगाव दाभाडे या ठिकाणी राहत होते. रवींद्र महाजनी यांचे निधन वयाच्या 77 व्या वर्षी पुण्यामधील तळेगाव दाभाडे या ठिकाणी त्यांच्या राहत्या घरी झाले. रवींद्र महाजनी हे सात – आठ महिन्यांपासून पुण्यामधील तळेगाव दाभाडे या ठिकाणी राहत होते असे म्हटले जात आहे.रवींद्र महाजनी यांच्या जाण्यामुळे  मराठी चित्रपट सृष्टी मध्ये दुःख व्यक्त केले जात आहे. रवींद्र महाजनी हे मराठी चित्रपट सृष्टीमधील अतिशय उत्कृष्ट असे अभिनेते होते.

       रवींद्र महाजनी यांच्या पुण्यामधील घरामधून दुर्गंधी येत होती, त्यामुळे शेजाऱ्यांनी तात्काळ पोलीस स्टेशनमध्ये धाव घेतली आणि सर्व प्रकार पोलिसांना सांगितला त्यानंतर पोलिसांनी रवींद्र महाजनी यांच्या घराचा दरवाजा तोडून आत मध्ये प्रवेश केला तर त्या ठिकाणी रवींद्र महाजनी यांचा मृतदेह आढळून आला. प्राथमिक अंदाज पोलिसांद्वारे असा वर्तवला जात आहे की ,रवींद्र महाजनी यांचा मृत्यू कदाचित दोन-तीन दिवसांपूर्वी झालेला असावा.

    गश्मीर महाजनी म्हणजेच रवींद्र महाजनी यांचा मुलगा यांस पोलिसांनी घडलेल्या घटनेची माहिती कळवली असता तो तत्काळ पुण्यामध्ये दाखल झाला. रवींद्र महाजनी यांचा मृतदेह शवविच्छेदनासाठी सोपविण्यात आलेला आहे. त्यानंतर रवींद्र महाजनी यांचा मृतदेह मुलगा गश्मीर महाजनी याच्याकडे सोपवण्यात येईल, शनिवारी अंत्यसंस्कार होतील अशी माहिती मिळत आहे.

      रवींद्र महाजनी यांच्या जाण्यामुळे मराठी चित्रपट सृष्टीवर शोककळा पसरली असून अशोक सराफ एका वृत्तवाहिनीला ( लोकशाही वृत्तवाहिनी ) प्रतिक्रिया देत असताना म्हणाले की, ” मराठी चित्रपट सृष्टीतील ही खूप वाईट घटना आहे. तो माझा चांगला मित्र होता. आम्ही अनेक चित्रपटांमध्ये एकत्र काम केले आहे. त्याचं व्यक्तिमत्व प्रसन्न होतं. रवींद्र मराठी चित्रपट सृष्टीतील देखना नट होता. त्याच्या जाण्याने मी एक चांगला मित्र गमावला आहे. मराठी चित्रपट सृष्टीने देखना नट गमावल्याचे दुःख आहे. हे दुःख भरून येण्यासारखं नाही. सुंदर दिसण्याबरोबरच कामही उत्तम करणारा तो एकमेव नट होता.’

       मराठी चित्रपट सृष्टी सोबतच रवींद्र महाजनी यांनी हिंदी तसेच गुजराती चित्रपटांमध्ये सुद्धा अभिनय केलेला आहे. रवींद्र महाजनी यांनी व्ही. शांताराम यांनी दिग्दर्शन केलेला ” झुंज” या चित्रपटांमध्ये काम करून चित्रपटसृष्टीमध्ये पदार्पण केले.

 रवींद्र महाजनी यांचे पुढील चित्रपट विशेष असे गाजले होते :

1985 मध्ये प्रदर्शित झालेला ” मुंबईचा फौजदार “

1978 मध्ये प्रदर्शित झालेला ” लक्ष्मी“

1979 मध्ये प्रदर्शित झालेला ” दुनिया करी सलाम“

1981 मध्ये प्रदर्शित झालेला ” गोंधळात गोंधळ“

      1997 मध्ये प्रदर्शित झालेल्या ” सत्तेसाठी काहीही ” या चित्रपटाचे दिग्दर्शन आणि निर्मिती सुद्धा रवींद्र महाजनी यांनीच केली होती.” देवता ” हा सुद्धा रवींद्र महाजनी यांचा गाजलेला चित्रपट आहे. ” देऊळ बंद ” या मराठी चित्रपटामध्ये सुद्धा त्यांनी छोटीशी भूमिका केलेली आहे.

कॉमनवेल्थ वेटलिफ्टिंग चॅम्पियनशिप 2023: 

Commonwealth Weightlifting Championships 2023

       भारतामधील ग्रेटर नोएडा येथील गौतम बुद्ध युनिव्हर्सिटीमध्ये बुधवारी सिनियर कॉमनवेल्थ वेटलिफ्टिंग चॅम्पियनशिप 2023 मध्ये, आपल्या भारत देशाने पहिल्याच दिवशी तीन सुवर्णपदे जिंकून मोठे यश मिळवले आहे. ज्ञानेश्वरी यादव यांनी 49 किलो वजनी गटांमध्ये माजी आशियाई चॅम्पियन झिली दलाबेहराला हरवले आणि सुवर्णपदक स्वतःच्या नावावर केले. तसेच कोमल कोहोर (महिला ४५ किलो) आणि मुकुंद आहेर (पुरुष ५५ किलो ) या दोघांनी सुद्धा अव्वल स्थान पटकावले आहे.

    तर माजी आशियाई चॅम्पियन झिली दलाबेहरा (महिला ४९ किलो) आणि श्राबानी दास (महिला ५५ किलो) यांना रौप्यपदकावर समाधान मानावे लागले.

    कोमल कोहरन यांनी एकूण 154 किलो (68 किलो स्नॅच + 86 किलो क्लीन अँड जर्क) उचलून त्या दिवसाचे भारताला पहिले पदक मिळवून दिले. कोमल कोहरन यांच्या पाठोपाठ श्रीलंकेच्या श्रीमाली समाराकून दिविसेकरा यांनी 146 किलो (61 किलो + 85 किलो) वजन उचलून रौप्यपदक मिळवले.

     माल्टाच्या किम कॅमिलेरी लगानाने 134 किलो (58 किलो + 76 किलो) वजनासह कांस्यपदक पटकावले. महिलांच्या 45 किलो वजनी गटात फक्त तीन वेटलिफ्टर्सने सहभाग घेतला होता.

     महिलांच्या 49 किलोमध्ये, गेल्या वर्षी ज्युनियर वर्ल्ड वेटलिफ्टिंग चॅम्पियनशिपमध्ये रौप्यपदक जिंकणाऱ्या ज्ञानेश्वरी यादव यांनी 176 किलो (78 किलो + 98 किलो) अव्वल स्थानासाठी नोंदणी केली आहे.

     2019 कॉमनवेल्थ चॅम्पियन झिली दलाबेहरा हिने 169 किलो (75 किलो + 94 किलो ) एकत्रित लिफ्टसह रौप्यपदक जिंकले, त्यानंतर कॅनडाच्या अलिना इस्मागुइलोव्हाने 160 किलो (68 किलो +92 किलो )  कांस्यपदक जिंकले.

    पुरुषांच्या 55 किलो वजनी स्पर्धेमध्ये मुकुंद आहेर यांनी वर्चस्व गाजवत 239 किलो (106 किलो +133 किलो) एकूण वजन उचलून वरिष्ठ आणि कनिष्ठ दोन्हीही गटामध्ये सुवर्णपदक जिंकले.

    वरिष्ठ गटामध्ये ,बांगलादेशच्या मोहम्मद आशिकुर रहमान ताजने स्नॅचमध्ये 92 किलो आणि क्लीन अँड जर्कमध्ये 105 किलो एकूण 207 किलो वजन उचलून रौप्यपदक मिळवले.

     वरिष्ठ महिलांच्या ५५ किलो वजनी गटामध्ये एकूण नऊ वेटलिफ्टर्सनी भाग घेतला होता. ऑस्ट्रेलियाच्या क्लो पार्किन्सने 152 किलो (66 किलो + 86 किलो) वजन उचलून कांस्यपदक मिळवले. कॉमनवेल्थ वेटलिफ्टिंग चॅम्पियनशिप 2023 मध्ये ज्युनियर, युवा आणि वरिष्ठ इव्हेंटमध्ये 20 देशांमधील 250 हून अधिक… पदकांसाठी स्पर्धा करत आहेत. या स्पर्धांचा समारोप 16 जुलै रोजी होणार आहे.